O Concello de Coristanco, en colaboración dos Equipos de Dinamización da Lingua Galega dos centros educativos CPI Alcalde Xosé Pichel, CEIP Canosa-Rus, CEIP Bormoio-Agualada e Cra A Tarandeira, organiza o IX Certame Artístico-Literario de Asunción Antelo, figura e referente artístico e literario grazas a súa gran bagaxe e legado cultural formado por innumerables obras de madeira, pedra e barro; e da que afloraron tamén ringleiras de versos froito da súa vizosa creatividade.
A finalidade desta convocatoria, un ano máis, é conmemorar a herdanza desta autora con gran sensibilidade e emoción poética, que escribía con liberdade, poemas nos que describía cos detalles máis minúsculos, pedaciños da súa vida. Pretendemos así fomentar os valores literarios, promover a creación e a difusión cultural de Coristanco e descubrir o talento tendo como inspiración a Asunción Antelo, Rexubeira de Bergantiños.
Descargar Decreto (pdf)Prazo de presentación: 3 ao 15 de maio de 2024
Lugar de presentación: CPI Alcalde Xosé Pichel, CEIP Canosa-Rus, CEIP Bormoio-Agualada e Cra A Tarandeira.
Modalidades: Cómic, Narrativa, Poesía, Monográfico e Debuxo.
A entrega de agasallos terá lugar no transcurso dun acto público o vindeiro 27 de maio, no Salón de Actos do Edificio de Servizos Múltiples de Coristanco.